S' Spritzehaus unserer Feierwehr hat em Schulhof gestann. Wann's gebaut worr is, kann ich net soh. Sicher awer späder als die Feierwehr gegrinn woor is. Des worr 1897.

Hinne an de Schulscheier hot's so gestann, daß mer ringstichrum loowe konnten. Die scheenste Fangspeeler konnt m'r da mache. En de Pause hot sich veelmols alles am oder noch besser ums Spritzehaus abgespeelt. Net noor desweh woor vor uns Kinner – vor allem vor uns Buwe – unsri Feierwehr immer oh bsondri Sach. Ich moon debei net, wann se ausge-rickt is zum Lesche. En deme Fall henn die Eldere ehre Kinner net fortgeloß. Awer wann die Feierwehr geiebt hat, da woor mer debei, vor allem die Buwe. Ooch wammer noor vun weidem zugucke durften, hemmer genoo uffgepaßt un ball gewißt, wie die Schleich ausgerollt, wie se zammegesteckt warren, was m'r mache muß, daß die Pump gschwind Wasser zieht, wann die Feierhooge, die Äxschte un die Feierpletsch genumm warren. Mer henns en Gedanke schun genoo su gut gekennt, wie die Feierwehrmänner.

Wann Sunndogs Nohmittogs d'r Hornischt zur Iewung geblooß hat, do woor m'r dehoom net se halle.

Em Schulhof vor'm Spritzehaus sein die Männer en ehre blooe Uniform, de Helme mit dem geele Wulst, dar ausgsieh hot wien Kickelkamm, oohgetrett. Am Gartel hat jeder oh Ax hännge, die ball ausgsieh hot wie ahn kloone Killoff (Spitzhacke). D'r Feierwehrhauptmann hot sei Kommandos geh. Bis 1935/36 noch noem österreichsche Reglement. Die äldere Männer hadn jo alle em österreichische Heer gedient. S'woorfen ganz poor chargierte debei, die's kummudiere ganz schee konnten. D'r Johann Senft (Tatusch) oder d'r Johann Zimmermann, (weil mer viere mit dem Norne haddn, hen die Leit "Janschu" oder ooch "Achtun-sechsziger" zu ehm gsooht (sei Haus hat die Nummer 68)) die wooren domols Feierwehr-hauptleit un hen des bsonders gut gekonnt. De "Janschu" hot dann de Senft Heinrich ("Senft de Tischler") abgeleest. Dar hott noor noch polisch kummudiere derfe. Noem Tod vum aide Pilsudsky woors ja mit de Deitschfreindlichkeit de Polagge vorbei. Do hennse ooch des eng-fiert. Die erseht Zeit haddn die Männer ehri Plooh demit, awer dann ises gang.

Em polische Nochberdorf Scharmin (Czermin) hot's jo ooch oh Feierwehr geb, die hat immer am Weier geiebt. S'woor jo noor ohn Katzesprung bis dort he. Do henn mer Buwe ooch dort zugeguckt un konnten wegleiche, welli s'besser konnt. Unsri Mohning woor immer, die Hohenbacher sein gschwinder.

S'woor 1938 oder schun 39. Die Hetz un de Druck gegen die "Schwabbe" is immer starker worr. Unsri Feierwehr hat enner ooch en de Ooh gestoch. Am liebste hedden die Polag-ge se uffgeleest. Dezu brauchten se awer ohn Grund. Den wollten se schun schaffe: Dezu is die Scharminer Feierwehr, ohgfiert vun ohme Feierwehrewerschte vun Miliz (Mielec), net ohgemeld awer mit "karacho" ens Dorf kumm. D'r Heinrich Stallmann woor domols Hor-nischt. Ich siehn ehn heit noch, wie ar, sei Feierwehrzeig unnerm Orm, losgerennt is, un ge-bloos hot, als ob die Welt unnergeh wallt. Alles was Boo hat, hinnerhar. Die Männer, die am nächste zur Schul haddn, wooren gschwind am Spritzehaus, un haddn die Spritz rausgschopp. Ohne uf die Geil se woorte, sein se losgfohr.

Die polisch Feierwehr is en die Nr. 9 bei's Edmund Hausers nengfohr, die deitsch Feier-wehr hot d'r Ewerscht en die Nr. 8 bei's Duys engewess. Die poor Männer, die da wooren, heddn drei Sache uff oh mol mache gemißt. Die große Buwe henn awer geholf. Saug-schlauch ohschliese, Schleich ausrolle, wie oft hen se en Gedanke schun mitgemacht. Ohn so'n Halbdicke schnappt sich de Melkohmer vum Zau, schleppt aus'm Kühlzuwwer for die Milch s'Wasser un schitt's en die Pump. Mit'm Brunneschwengel, mer haddn ja noch Zieh-brunne, un de Stitz het des veel länger gedauert. Die Männer haddn kaum die Schleich zam-me un ooh Spritzrohr oohgschloß, da hot die Pump schun gezoh, un's Dach is naß gemacht worr. Uff oohmol ruft ohner vum Weg har, dar die polisch Feierwehr sieht: "Hecher, me rechts". Die Spritzemänner henn des gleich begreff un hallen s'Rohr so, daß des Wasser iw-wers Dach ens Hausers Hof spritzt. Die Feierwehrmänner dort sein lang net so weit. Wie se d'r Strahl trifft, sein se so weschrock, daß se erschte mal wegrennen. D'r Millizer Feierweh-rewerscht flucht farchterlich, kummudiert un rennt selwert an die Spritz. Awer jetzert fangt s'zwatte Rohr vun unsere Spritz ooh un tungt die Polagge so richtig en. Sie kriehn ehri Spritz nemme en Gang.

Dem Ewerschte bleibt nix anneres iwrich, als die Iewung abzubreche. Des was ar mit unsere Wehr vorhat, woor mit seinere gscheh. Die Scharminer Feierwehr zieht, so naß wie se is, ab.

D'r Ewescht will noch unsri Wher inspiziere, ob och alles vorschriftsmäßg do is. Wie ar niwwer kummt ens Duye, missen die Männer en Reih un Glied ohtrette. D'r Feierwehrhaupt-mann macht Meldung, un d'r Milizer Ewerscht guckt sich die Leit oh. Sein net alle vor-schrifstmäßig ohgezoh. Des soht ar ooch. An de Spritz awer kann ar nix aussetze. Wie wollt ar ooch? Segor Geil stehn devor. D'r Wojtek, s'Duye Knecht, hat se ohgscharrt un engspannt.

D'r Ewerscht steht ooh ganz Weil an d'r Spritz, guckt se ooh, kloppt mit de Hand uff se, als oh ar so de Grund firme ted, warum se so gschwind gespritzt hot.

Mer Buwe awer henn den Grund immer schun gewißt. –

Jetzert haddn m'r den Beweis.

Die Hohenbacher Feuerwehr 1907 – 10jähriges Jubiläum –

Von rechts nach links sitzend:

1. Heinrich Senft (Nr. 36 – Dreispitz), 2. Johann Konrad (Nr. 19), 3. Johann Senft (Nr. 17 – Tatusch), 4. Heinricht Senft (Nr. 43 – Großheinrich);

erste stehende Reihe: 6. Joahnn Walther, 7. ?, 8. Edmund Hauser (Nr. 9), 9. Heinrich Zimmermann (Nr. 38); 10. Edmund Senft (Nr. 15 – Bäcker), 11. Johann Roland (Lehrer), 12. Friedrich Sapp (Nr. 2), 13. Heinrich Senft (Nr. 34 – Krakus), 14. Heinrich Ulm (Nr. 22), 15. Edmund Zimmermann (Nr. 7), 16. Stallmann, 17. Philipp Hauser (Nr. 31),

zweite stehende Reihe: 18. Emil Senft (Golleschauer Senft), 19. Krieg (Nr. 11), 20. Joahnn Stallmann, 21. Jakob Stamm (Nr. 29) 22. Thedor Rudolf (Nr. 44 – Todek), 23. Johann Senft (Nr. 48 – Japan), 24. Nikolaus Duy (Nr. 8), 25. Johann Hauser (Nr. 26), 26. Emil Senft (Nr. 16 – Minus), 27. Adolf Hill, 28. Johann Bauer, 29. Johann Zimmermann (Nr. 42 – Beereboom).